Неказнетите напади на Израел врз правото на Палестинците на здравје добиваат невидени размери во историјата, осудија во четвртокот двајца специјални известувачи на Обединетите нации, по израелскиот напад на болницата „Камал Адван“ во Газа и апсењето на нејзиниот директор.
Претставништвото на Израел во ОН во Женева оцени дека оваа изјава е „многу далеку од вистината“ и дека „ги игнорира клучните факти“ и дека „Хамас користи цивилни згради за воени цели“.
Известувачот за ситуацијата на палестинските територии окупирани од 1967 година, Франческа Албанезе, која постојано го обвинува Израел за геноцид во Газа, и известувачот за правото на физичко и ментално здравје, Тлаленг Мофокенг, бараат „да се стави крај на бесрамното непочитување на правото на здравје во Газа, по минатонеделната рација во болницата Камал Адван и произволното апсење и притворање на нејзиниот директор Хосам Абу Сафи“.
„Ужаснети сме и загрижени од извештаите од северниот дел на Појасот Газа, а особено од нападите врз здравствените работници, вклучително и последната од 22-те болници кои сега се уништени: болницата „Камал Адван““, напиша двајца експерти со мандат од Советот за човекови права на Обединетите нации, но тие не зборуваат во име на ОН.
Тие велат дека се „сериозно загрижени за судбината на д-р Хосам Абу Сафи“ чиј син, како што велат, бил убиен пред негови очи и бараат негово итно ослободување, како и „сите други здравствени работници кои се произволно приведени.
„Тоа е дел од израелскиот модел чија цел е континуирано бомбардирање, уништување и целосно уништување на остварувањето на правото на здравје во Газа“, велат тие.
Според израелската армија, „Камал Адван“, која била последната голема болница која функционирала на северот на палестинската територија опустошена од повеќе од една година војна, била команден центар за исламистичките борци на Хамас.
„Добро е документирано дека Хамас користи болници и медицински центри за терористички активности“, изјави израелската војска за АФП на прашањето за изјавата на известувачите на ОН.
„Продолжуваме да ја повикуваме меѓународната заедница недвосмислено да бара Хамас веднаш да престане да ги користи болниците во Појасот Газа како штит за своите терористички активности“, додаде армијата, која тврди дека ги презема „сите можни оперативни мерки за да ја ублажи штетата врз цивилите, вклучувајќи конвои и хуманитарни работници“.
Повеќе од 1.057 здравствени работници загинаа за време на војната во Појасот Газа, предизвикана од нападот на Хамас врз Израел на 7 октомври 2023 година, подвлекуваат новинарите, цитирајќи податоци од Министерството за здравство на владата на палестинското исламистичко движење.
Генералниот директор на Светската здравствена организација (СЗО), Тедрос Аданом Гебрејесус, во четвртокот на платформата Х изрази жалење за „ужасно бавното“ темпо на медицинските евакуации од Газа.
„Само 5.383 пациенти се евакуирани со поддршка на СЗО од октомври 2023 година, вклучително и само 436 од затворањето на преминот Рафах“ со Египет во мај 2024 година, рече тој. Со тоа темпо, „ќе бидат потребни пет до десет години“ за да се евакуираат повеќе од 12.000 луѓе на кои им е потребна помош, напиша тој.