Израелските воздушни напади врз Појасот Газа продолжија денеска додека странските посредници се обидуваа да посредуваат за прекин на огнот.
Во нападите што почнаа во вторникот, загинаа 30 Палестинци, а едно лице загина во Израел во одмазднички палестински ракетен истрел.
Исламски џихад вчера попладне истрела ракети со долг дострел во правец на Израел, а шрапнели погодија станбена зграда во градот Реховот во централен Израел.
Израелските воени авиони потоа ги гаѓаа местата од кои беа истрелани ракетите.
И покрај спорадичните израелски напади, ситуацијата денес е релативно мирна.
Исламски џихад синоќа не истрела ракети кон Израел, што ги зголеми надежите дека Египет, Катар и ОН ќе можат да посредуваат за прекин на огнот.
Цел на израелските напади оваа недела е Исламски џихад, втората по големина екстремистичка организација во Појасот Газа, со кој управува Хамас.
Од почетокот на нападот убиени се пет команданти на Исламски џихад, како што тврди израелската страна, а членовите на таа организација истрелале повеќе од 800 ракети во правец на густо населените делови на Израел.
Израелската војска погоди најмалку 215 цели во Појасот Газа, вклучително и локации каде што беа истрелани ракети и мини и екстремисти кои се подготвуваа да ги лансираат.
Седум деца и четири жени се убиени во Појасот Газа, соопшти хуманитарната канцеларија на ОН.
Израелската војска и Палестинскиот центар за права соопштија дека најмалку три деца биле убиени кога палестинските ракети биле погрешно испукани и паднале во Појасот Газа.
Според палестинското Министерство за здравство, повредени се повеќе од 90 Палестинци.
Смртта на цивили предизвика осуда во арапскиот свет и загриженост во САД и Европа.
Во претходните четири војни против Хамас, Израел се соочи со обвинувања за воени злосторства за смрт на цивили и употреба на тешко оружје на густо населена територија.
Израелските власти одговорија на обвинувањата дека палестинските екстремистички организации користат цивили како жив штит со напади од населени места.
Пред да ескалираат судирите вчера, се чинеше дека е извесен прекин на огнот.
Денешната релативна смиреност ги зголеми надежите дека ќе се постигне договор.
Претставници на Хамас утринава изјавија за локалните медиуми дека Египет ги засилува напорите да го запре насилството и да преговара и со Хамас и со Исламскиот џихад.
Израелскиот напад започна, како што беше речено, како одмазда за ракетниот напад на Исламски џихад врз Израел минатата недела по смртта на член на таа организација кој штрајкуваше со глад во израелски затвор.
Високиот функционер на Исламскиот џихад, Ихсан Атаја, денеска се пожали дека посредниците не можат да ѝ дадат никакви гаранции на организацијата.
Тој рече дека има недоразбирање околу барањето на Исламски џихад Израел да престане со целните убиства.
Последниот конфликт меѓу Израел и Исламскиот џихад, најжесток од август минатата година, започна со истовремени израелски воздушни напади во кои загинаа тројца команданти на организацијата, две од нивните сопруги и деца додека спиеле во своите домови.
Шефот на политичкото крило на Исламскиот џихад, Мухамед ал-Хинди, беше пооптимист.
Тој во Каиро рече дека се надева дека двете страни ќе постигнат договор денеска и ќе го почитуваат.