Израелската армија синоќа повторно испрати тенкови и војници во Појасот Газа за да ги нападнат оперативците и целите на исламскиот екстремистички Хамас, кој владее во таа палестинска енклава.
Како што соопшти армијата, во рацијата, втора ноќ по ред, во близина на населбата Шуџаи во источниот дел на градот Газа, учествуваат пешадиски единици, оклопни и други единици со поддршка на беспилотни летала и борбени хеликоптери.
Беа извршени артилериски и воздушни напади врз цели на Хамас, вклучително и локации за лансирање на противтенковски наведувани ракети и командни центри.
Сите припадници на израелските сили се вратија по неколку часа и нема повредени.
Овие рации, како што беше најавено, претходат на поширока копнена офанзива.
Портпаролот на израелската војска Даниел Хагари синоќа изјави дека копнените упади ќе продолжат додека се подготвуваат следните фази од војната против Хамас.
Тој рече дека израелската армија продолжува да ја напаѓа Газа од воздух и од море и е фокусирана на убивање на високи команданти на Хамас и уништување на инфраструктурата на организацијата.
Израелскиот министер за одбрана Јоав Галант изјави дека дошле „одлучувачки моменти“ и дека војната е за куќата и дека победата ќе биде извојувана, објавија израелските медиуми.
„Ќе дојдат и дополнителни чекори во војната, им создаваме услови и ќе ги спроведеме“, рече Галант, додавајќи дека ќе се направат „врвни напори“ да се вратат повеќе од 200 заложници кои ги држат екстремистите.
Повеќе од 7.000 луѓе во Газа, вклучително и речиси 3.000 деца, и повеќе од 1.400 луѓе во Израел беа убиени во војната предизвикана од нападите на Хамас врз јужен Израел на 7 октомври.