Израелскиот парламент усвои закон со кој на Врховниот суд му се одземаат овластувањата да ги блокира владините одлуки, што е прв дел од планираната судска реформа која остро го подели израелското општество и наиде на жестоки критики од Белата куќа, јавува Си-Ен-Ен.
Контроверзниот закон беше усвоен со 64 гласа „за“ и 0 во Кнесетот. Сите членови на владејачката коалиција гласаа за законот, додека сите пратеници од опозицијата го напуштија Кнесетот додека се гласаше.
Голема група демонстранти се собраа надвор, обидувајќи се да го блокираат пристапот до зградата.
Тие беа пречекани со бодликава жица и водени топови, а најмалку 19 се уапсени, соопшти израелската полиција.
Илјадници воени резервисти вклучително и повеќе од 1.100 офицери на воздухопловните сили — уште пред усвојувањето на законот рекоа дека ќе одбијат доброволно да се пријават на должност доколку законот помине.
Поранешниот израелски премиер Јаир Лапид рече дека во вторник ќе поднесе петиција до Врховниот суд да го блокира законот и ги повика резервистите да не одбиваат да служат додека судот не донесе одлука.
Законот му ја одзема моќта на Врховниот суд да ги блокира владините одлуки прогласувајќи ги за неразумни.
Движењето за квалитетна влада, израелска невладина организација, веднаш по гласањето поднесе петиција до Врховниот суд, барајќи од судот да го прогласи законот за незаконски со образложение дека ја менува основната структура на израелската демократија и бара да го блокира неговото спроведување додека судот не донесе одлука.
Премиерот Бенјамин Нетанјаху, кој ја напушти болницата во понеделникот наутро, откако беше опремен со пејсмејкер, го протурка законот и покрај се посилните предупредувања да не го прави тоа од најважниот сојузник на Израел, САД.
Подоцна рече дека усвојувањето на законот е неопходен „демократски потег“ и дека „ја исполни волјата на гласачите“.
Тој, исто така, ги повика резервистите да не одбиваат да и служат на земјата.
„Повикот за отфрлање штети на безбедноста на сите граѓани на земјата“, рече тој.
Говорејќи откако Кнесетот го усвои законот во понеделникот, Белата куќа рече дека е „за жалење што денешното гласање беше спроведено со најтесно можно мнозинство“.