Израел уби тројца високи команданти на Исламски џихад во воздушни напади во Појасот Газа.
Најмалку девет цивили, вклучително и четири деца, исто така беа убиени за време на нападот, соопштија палестинските власти.
Воздушните напади, за кои израелската војска рече дека биле извршени против милитантната група, се последниот инцидент во повеќе од една година на ескалација на насилството што доведе до обновени израелски воени напади, бран палестински улични напади врз Израелците и ескалација на конфликт.
Очевидци изјавија дека во вторникот рано наутро експлозија го погодила горниот кат на станбена зграда во градот Газа и куќа во градот Рафах.
Воздушните напади биле насочени кон места за обука на милитанти, објави АП, пренесува Гардијан.
Израелската војска соопшти дека мета биле тројца високи команданти на Исламски џихад, втората најмоќна вооружена група во блокираната крајбрежна енклава, која е под контрола на исламистичката милитантна група Хамас.
Во нападите учествувале 40 авиони, соопшти армијата.
„Секој терорист што ќе им наштети на израелските граѓани ќе биде принуден да зажали“, рече израелскиот министер за одбрана Јоав Галант.
Здравствениот претставник на Газа рече дека најмалку 12 лица загинале, а 20 се ранети во нападите што ги погодија станбените области во густо населениот појас.
Портпаролот на израелската армија рече дека армијата ги истражува извештаите за загинати цивили, но немаше моментален коментар.
„Нема да ги напуштиме нашите позиции и отпорот ќе продолжи, ако даде Господ.
Тоа се Џихад Шакер ал Ганам, секретар на воениот совет на бригадите Ал Кудс, Калил Салах ал Бахтини, командант на северниот регион и Тарик Мухамед Езедин, водач на воените операции на окупираниот Западен Брег.
Военото крило на Исламскиот џихад ја потврди смртта на тројца команданти.
Воздушните напади, кои започнаа нешто по 2 часот по полноќ по локално време, продолжија речиси два часа, според извештаите на агенцијата Франс прес, при што се слушна уште една експлозија на истокот.
Израелската војска соопшти дека цели на 10 локации за оружје и инфраструктура, вклучително и работилници за производство на ракети и оние за правење бетон што се користи за тунели, како и воени штабови кои припаѓаат на групата.
Пред нападот таа ги повика граѓаните кои живеат во градовите на 40 километри од Газа да останат во близина на засолништата.
Милитантните групи рекоа дека ќе одговорат на нападите.
„На бомбардирањето ќе биде одговорено со бомбардирање, а на нападот ќе биде одговорено со напад“, изјави Тарек Селми, портпарол на Исламски џихад.
Палестинското Министерство за надворешни работи остро го осуди израелскиот напад и рече дека политичките преговори се единствениот начин за постигнување безбедност и стабилност.
Минатата недела милитантите во Газа истрелаа неколку бранови ракети кон јужен Израел, а израелската војска одговори со воздушни напади, по смртта на висок член на Исламски џихад, Кадер Аднан, во израелскиот затвор каде што штрајкуваше со глад. Постигнат е прекин на огнот со посредство на Египет, ОН и Катар.
Повеќе од 100 Палестинци и најмалку 19 Израелци и странци се убиени во судирите од јануари.