Израелската влада објави дека се согласила со предлогот на претседателот на Соединетите Американски Држави (САД) Доналд Трамп за прекин на огнот, објави Би-Би-Си
Во соопштението се вели: „Израел ќе одговори силно на секое кршење на прекинот на огнот“.
Израелската влада соопшти дека се согласила со предлогот за прекин на огнот откако „ги постигнала целите“ на своите напади врз Иран.
Според соопштението, Израел ја отстранил „двојната непосредна егзистенцијална закана“ на Иран од нуклеарно оружје и балистички ракети.
Исто така, се вели дека Израел „предизвикал сериозна штета на военото раководство и уништил десетици цели на централните ирански владини единици“.
Во соопштението се вели дека израелските сили, во последниот ден, „погодиле владини цели во срцето на Техеран, елиминирајќи стотици оперативци на Басиџ“ – милиција што често ја користи иранската влада за потиснување на протестите – и „елиминирајќи уште еден висок нуклеарен научник“.
„Израел им се заблагодарува на претседателот Трамп и на Соединетите Американски Држави за нивната одбранбена поддршка и нивното учество во елиминирањето на иранската нуклеарна закана“, се додава во соопштението.
Иранскиот државен медиум SNN објави дека Иран испалил „последен круг ракети“ кон Израел пред да стапи на сила прекинот на огнот, објави BBC.
BBC објави дека Израел соопштил дека претходно открил бранови ракетни напади, во кои загинаа најмалку четири лица.
Иранската државна телевизија, исто така, објави дека прекинот на огнот е „наметнат“ врз Израел по бранот ирански напади.
Израел јавно не го прифатил предлогот за прекин на огнот, според BBC.
Израелските пожарникари и други спасувачки служби објавија дека извлекле четири тела од зграда погодена од иранска ракета во градот Бершева.
Улиците на тоа место, на југот на Израел, се покриени со стакло и друг отпад, прозорците се разнесени од зградите пред кои се собрале исплашени луѓе.
Спасувачките екипи изјавија дека трагаат по исчезнатите лица.
Иранското бомбардирање е извршено само неколку часа откако американскиот претседател Доналд Трамп објави дека Иран и Израел се согласиле на прекин на огнот.
Најавата на Трамп дека Израел и Иран се согласиле на „целосен прекин на огнот“ дојде кратко откако Иран во понеделникот изврши ракетен напад врз американската воена база во Катар како одмазда за американското бомбардирање на неговите нуклеарни постројки.
Израел не ја потврди најавата на Трамп за прекин на огнот, но немаше извештаи за израелски напади во Иран по четири часот утрово.
Израелски засилени напади беа извршени врз неколку ирански градови пред да стапи на сила прекинот на огнот.