Рано утринава израелската армија погоди висококатница во јужните предградија на Бејрут, при што загинаа најмалку три лица, во напад чија цел, како што се наведува, бил припадник на милитантната група Хезболах.
Ненајавениот воздушен напад дојде неколку дена откако Израел го нападна либанскиот главен град Бејрут во петокот, прв од ноември, кога со прекин на огнот завршија борбите меѓу израелските сили и милитантната група Хезболах.
Во воздушниот напад на Бејрут утринава се ранети најмалку седум лица, соопшти либанското Министерство за здравство.
Израелската војска соопшти дека последниот напад бил насочен кон член на Хезболах кој ѝ помагал на палестинската група Хамас во Појасот Газа во нападите против Израел.
Армијата додаде дека нападот бил извршен по инструкции на израелската разузнавачка агенција Шин Бет.
Од видеата на социјалните мрежи се гледа дека се оштетени три ката од станбената зграда и возилата кои биле паркирани пред неа.
Примирјето со посредство на САД стави крај на 14-месечната војна меѓу Израел и Хезболах.
Според условите на прекинот на огнот, израелските сили требаше да се повлечат од либанската територија до крајот на јануари, додека Хезболах требаше да го прекине своето вооружено присуство јужно од реката Литани долж границата со Израел.
Израел извршува секојдневни напади во јужен и источен Либан откако стапи на сила прекинот на огнот, велејќи дека целта на тоа биле претставници и инфраструктурата на Хезболах.
Либанската армија постепено се распоредува на југот на земјата, а Бејрут апелираше до меѓународната заедница да изврши притисок врз Израел да ги прекине нападите и да ги повлече силите кои се уште се наоѓаат на пет ридови на либанска територија.