Латинскиот патријарх на Ерусалим Пјербатиста Пизабала предупреди дека доаѓањето на власт на ултрадесничарската коалиција на израелскиот премиер Бенјамин Нетанјаху го влоши животот на христијаните во колевката на христијанството.
Како што беше објавено денеска, патријархот во интервју за АП рече дека 2.000-годишната христијанска заедница е изложена на зголемени напади и дека сегашната, најдесничарска влада во историјата на Израел ги охрабрила екстремистите кои го вознемируваат свештенството и брзо вандализираат верски имот.
Движењето на еврејските доселеници, охрабрено од сојузниците во владата, се чини дека ја искористи можноста да ги прошири активностите во анектираниот Источен Ерусалим.
„Фреквенцијата на напади и агресија стана нешто ново. Овие луѓе чувствуваат дека се заштитени, дека културната и политичката атмосфера сега може да ги оправда или толерира акциите против христијаните“, рече Пикабала.
Изјавата на патријархот се чини дека ја доведува во прашање посветеноста на Израел за религиозна слобода содржана во основачката декларација на државата пред 75 години.
Израелската влада нагласи дека нејзин приоритет се верските слободи и односите со црквите кои имаат силни врски со странство.
Ова го потврди директорката на светскиот верски оддел при Министерството за надворешни работи на Израел, Тања Берг-Рафаели и посочи дека сите религии и сите малцинства имаат пристап до светите места.
Христијаните, сепак, чувствуваат дека властите не успеваат да ги заштитат нивните свети места од целни напади, а тензиите се зголемија по рацијата на израелската полиција во џамијата Ал-Акса што предизвика гнев на муслиманите и регионални судири минатата недела.
За христијаните, Ерусалим е местото каде што Исус бил распнат и воскреснат.
За Евреите, тоа е античката престолнина каде што се наоѓале библиските еврејски храмови.
Муслиманите веруваат дека пророкот Мухамед од таму се вознел на небото.
Во владата на Нетанјаху, лидерите на еврејските доселеници на окупираниот Западен Брег играат клучни улоги, вклучително и министерот за финансии Безалел Смотрич и министерот за национална безбедност Итамар Бен-Гвир, кој беше осуден за поттикнување анти-арапски расизам и поддршка на еврејски екстремистички групи.
Нивното влијание ги овласти еврејските доселеници кои се обидуваат да ја консолидираат еврејската контрола на окупираниот Западен Брег и анектираниот Источен Ерусалим и ги вознемири црковните водачи кои таквите напори ги гледаат како закана за христијанското присуство во светиот град.
Палестинците го тврдат тој дел од Ерусалим и се стремат да го направат главен град на нивната идна држава која ќе ги вклучува Западниот Брег и Појасот Газа.
Сите тие територии беа освоени од Израел во војната во 1967 година.
Отец Дон Бајндер, свештеник на англиканската катедрала Свети Џорџ, рече дека десничарските елементи меѓу другото се обидуваат да го јудејизираат Стариот град во Ерусалим и дека ништо не ги спречува, а црквите се главниот камен на сопнување.
Во Ерусалим денес живеат околу 15.000 христијани, а мнозинството се Палестинци.
Пред војната во 1967 година, ги имало околу 27.000, но тешкотиите со кои се соочиле потоа навеле многумина да емигрираат.
Судејќи според нејзиниот почеток, оваа година би можела да биде најлошата за христијаните во последната деценија, предвидува Јусеф Дагер од Меѓуцрковниот центар, организација која координира меѓу деноминациите.
Центарот вели дека физичките напади и малтретирањето на свештенството често не се пријавуваат, а најмалку седум сериозни случаи на вандализам се документирани оваа година, во споредба со шест минатата година.
Христијанските лидери за ова најмногу ги обвинуваат израелските екстремисти и велат дека стравуваат дека ќе има уште инциденти.
Во март, двајца Израелци упаднаа во базиликата во близина на Гетсиманската градина, каде што, според христијанската традиција, е погребана Дева Марија.
Го претепале свештеникот со метална прачка, а тоа е само еден од низата инциденти.
Христијаните тврдат дека израелската полиција не ги сфаќа сериозно повеќето напади, ниту ги казнува сторителите.
Од полицијата наведуваат дека детално ги истражуваат инцидентите без разлика на потеклото или верата.