По израелските воздушни напади во Појасот Газа во текот на ноќта и утринава, израелските одбранбени сили (ИДФ) објавија дека примирјето ќе продолжи денеска во 10 часот.
„ИДФ ќе продолжи да го почитува договорот за прекин на огнот и одлучно ќе одговори на секое негово прекршување“, се вели во соопштението, објави „Тајмс оф Израел“.
Армијата исто така наведе дека за време на нападот биле погодени десетици „терористички цели и оперативци“ на Хамас, вклучително и повеќе од 30 команданти, пишува „Тајмс оф Израел“.
Прекинот на огнот се спроведува во согласност со директивата на политичкиот ешалон, се наведува во соопштението.
Според последните податоци, бројот на жртвите во Газа во израелските напади извршени синоќа се искачи на 81, соопштија болничките власти.