За време на учеството во мировните преговори во Каиро, претставниците на Израел му доставија на Египет список со палестински затвореници кои Тел Авив не е подготвен да ги ослободи доколку се постигне договор за размена на заложници со Хамас.
Израелската делегација ќе се врати во Каиро следната недела за да ги продолжи разговорите, пишува „Тајмс оф Израел“ повикувајќи се на Канал 12.
Во преговорите во Египет учествуваа претставници на таа земја, Израел, Катар и САД, а во нацрт-предлогот за прекин на огнот во Газа беше наведено Хамас да ослободи 40 израелски заложници, меѓу кои и жени, помлади од 19 години, болни и над 50 години, додека Израелците би ослободиле околу 400 палестински затвореници кои нема да бидат повторно уапсени.
Американскиот претседател Џозеф Бајден во четвртокот оцени дека убиството на повеќе од 100 Палестинци кои чекале хуманитарна помош во Газа ќе ги усложни преговорите за прекин на огнот меѓу Израел и Хамас.