Израелската војска синоќа објави дека извршила воздушни напади врз позициите на милицијата Хезболах поддржана од Иран во јужен Либан, како одговор на нападите на групата врз северен Израел.
Нема извештаи за повредени, се вели во соопштението на израелската армија објавено во петокот вечерта.
Информацијата не можеше да се потврди независно.
Генералниот секретар на ОН, Антонио Гутереш, ја изрази својата „длабока загриженост“ поради ескалацијата на конфликтот меѓу Израел и Либан по Сината линија, демаркационата линија меѓу двете земји воспоставена од Обединетите нации.
„Ризикот од ширење на конфликтот е реален“
„Ризикот дека конфликтот на Блискиот Исток ќе се прошири е реален – и мора да се избегне“, рече тој.
„Еден непромислен потег – една погрешна проценка – може да предизвика катастрофа што ги надминува границите, и искрено, надвор од имагинацијата“, им рече тој на новинарите.
„Да бидеме јасни: луѓето од регионот и луѓето во светот не можат да си дозволат Либан да стане уште една Газа“, предупреди лидерот на ОН.
Со многу жртви од двете страни, меѓусебното гранатирање предизвика големи разурнувања во селата од двете страни на границата. Околу 150.000 луѓе беа евакуирани или ја напуштија борбената зона.
Хезболах е многу помоќен од Хамас
Хезболах е сојузник со исламистичката група Хамас во Појасот Газа, но се смета за многу помоќен.
Израел сака да употреби воен и дипломатски притисок за да обезбеди Хезболах да се повлече зад реката Литани, на 30 километри од границата – како што е наведено во значајната резолуција на ОН за конфликтот од 2006 година.
„Страните мора итно повторно да се обврзат за целосно спроведување на резолуцијата 1701 на Советот за безбедност и веднаш да се вратат на прекин на непријателствата“, рече Гутереш.
Од почетокот на војната во Појасот Газа во октомври, секојдневно има судири меѓу израелската армија, Хезболах и сојузничките групи во пограничната област меѓу Израел и Либан.
Израелците убиле еден од командантите
Израелската армија во четвртокот објави дека убила уште еден проирански командант на Хезболах во јужен Либан, пренесе ДПА.
Израелските одбранбени сили (ИДФ) објавија дека „терористот Фадел Ибрахим“ бил елиминиран од израелска летала во прецизен напад во областа Деир Киф во јужен Либан.
„Ибрахим беше командант на операциите на Хезболах во областа Џоуаија, како дел од својата улога, Ибрахим беше одговорен за планирање и извршување на терористички напади врз Израел и командување на копнените сили на Хезболах во областа Џоуаија“, соопшти израелската војска.
Либанската новинска агенција NNA претходно објави дека едно лице загинало во напад со дрон. Хезболах ја потврди смртта на командантот и рече дека како одговор на нападот во Деир Кифи, шиитската милиција истрела десетици ракети врз цели во северен Израел.