По четврти пат Куманово ќе биде домаќин на семинар за традиционална музика и игра под насловот „Глобалното кај локалното“
Семинарот е во организација на Центарот за култура „Трајко Прокопиев“ и е поддржан од страна на Министерството за култура и туризам како проект од нациоанлен интерес, а ќе се оддржи на 8 и 9 Април од 18:00 часот во фоајето и големата сала.
– Во изминатите три години, се реализираа едукативни работилници кои младото, пред се, кумановско население го едуцираа за сопственото културно наследство. Се повлекоа значајни паралели со соседните етнички предели и целата област, каде младите од овој дел живеат и им беше пренесена како значаен дел од културното наследство на целата земја, вели Дени Синадиновски од НУЦК „Трајко Прокопиев“.
Како што вели тој, само преку спознавање на локалното, може да се стигне до глобални знаења, па оттаму и темата за годинешниот семинар.
– Годинешниот семинар под наслов „Глобалното кај локалното“ ќе биде вистинско доживување за младата популација во Куманово и пошироко. Дебата, дискусија, методологија, критика ќе биде основата на овој семинар. Што значи орото Поступано за северното игроорно подрачје, што значи гајдата како инструмент во Брсјачката етнографска целина, што значи групата Костручанки за нашата земја, што значи празникот „Четересе“ во градот Штип, што значи да се обработи и постави обред на сцена, се едни од темите за дискусија на првиот ден од семинарот. Накратко, глобалните сегменти како влијаат на локалните, појаснува Синадиновски.
Во вториот, практичниот дел на семинарот, ќе бидат обработени најкарактеристичните ора од сите пет игроорни подрачја Копачка, Беранче, Тешкото и Поступано.
Семинарот за традиционлна музика и игра ќе понуди од базични етнолошки и етнокореолошки информации до врвни научни дострели по прашање на овие науки.
Целта на овој проект, како што додава Синадиновски, е афирмација на традиционалната култура во функција на запознавање и доближување кај младата популација, афирмацијата на младите уметници кои се занимаваат со истата, како и стручни усовршувања на носителите на дејноста.
Семинарот во изминатите години ги опфати темите „Од Средорек до Дурачка Река“, „Шопци/Которци“ и „Накуде Скопје“.
Никола Ивановски