Амбасадорот на Италијанската Република Карло Ромео денеска оствари протоколарна посета на Општина Куманово каде имаше средба со градоначалникот Максим Димитриевски.
На средбата се разговарало за на повеќе теми, а претставниците од Италија биле запознаени како функционира најголемата општина во Македонија. Главен акцент бил ставен на образовниот процес, односно изучувањето на италијснкиот јазик во кумановските училишта.
– Добивме потврда од амбасадорот дека кумановските ученици се едни од најдобрите студенти кои покажуваат одлични резултати на ниво на државата и воедно ја користам оваа прилика да се заблагодарам на студентите, учениците, но и наставниот кадар во нашата општина што успеваат на еден таков начин и во такви услови да одржат високо ниво на едукација на најмладите, рече Димитриевски.
Loading...
На средбата според првиот човек на градот се разговарало и за одбележувањето на Денот на Европа, 9. мај кога традиционално дел од државите на Европската унија ја презентираат својата култура во Куманово.
– Овој пат ќе бидат опфатени со свои пунктови пет држави од медитеранската група, а тука се Република Италија, Грција, Хрватска, Шпанија и уште неколку каде што ќе ги прикажат сите свои културно-историски добра и сите допирни точки со нашата држава. Интенцијата е да се продлабочи нашата соработка како најголема општина во државата, разговаравме и за економскиот интерес. Република Италија најавува и саем за градежништво, кој ќе биде одржан во Скопје и дел од нашите кумановски компании ќе бидат поканети да го посетат овој саем и да ги споделат взаемните искуства во делот и сегментот на градежништвото и повторно да потенцирам италијанските инвестиции се добредојдени во нашата општина, додае градоначалникот Максим Димитриевски.
Според амбасадорот Ромео на средбата се разговарало на повеќе теми важни за администрирање на еден голем град, како што е Куманово, а бил направен и преглед на ситуацијата во градот и она што Димитриевски го прави или има намера да го направи за да се подобри животот на граѓаните.
– Од бројните сектори кои што веќе беа напоменати каде може да се оствари соработка со Италија беше инфраструктурата, заштитата на животната средина, тоа се неколку од секторите кои што ние ги лоциравме како можност за соработка меѓу Куманово и повеќе италијански фирми. Од сите овие сектори се разбира во нивното развивање се веќе вклучени постоечки фирми од италијанско потекло кои што веќе се тука, но тоа отвора можност и за други италијански фирми да си го најдат своето место тука, а уште еден сектор за кој зборувавме е изучувањето на италијанскиот јазик и промоција на италијанската култура во Куманово, изјави амбасадорот Карло Ромео.
Како што додаде Ромео, по неодамнешната одлука италијанскиот јазик да биде воведен како втор странски јазик во основните и средни училишта, амбасадата е заинтересирана за соработката и со Куманово и со останатите градови во Македонија.
По средбата со градоначалникот Димитриевски, амбасадорот на Италија Карло Ромео оствари средба и со претставници од основните и средни училишта во градот и Секторот за образование.