Федералното истражно биро на САД (ФБИ) започна кривична истрага против поранешниот директор на Централната разузнавачка агенција (ЦИА) Џон Бренан и поранешниот директор на ФБИ Џејмс Коми, објави во вторник „Фокс њуз диџитал“.
Истрагите се спроведуваат поради наводни неправилности во минатите владини истраги за наводите за руско мешање во изборите во САД во 2016 година, што му помогна на претседателот Доналд Трамп да ја победи поранешната државна секретарка Хилари Клинтон, се вели во извештајот, според Хина.
ФБИ, ЦИА и Министерството за правда не ги коментираа наводите.
Кривичната истрага не мора нужно да резултира со обвиненија.
Бренан не одговори веднаш на барањето за коментар, додека Коми не беше достапен.
„Фокс“ соопшти дека се повикува на извори во Министерството за правда.
Се вели дека истрагите се насочени кон двајца поранешни функционери кои долго време го предизвикуваат гневот на Трамп и неговите поддржувачи поради нивната улога во истрагата за руското мешање во изборите во 2016 година.
Коми го водеше ФБИ кога властите започнаа кривична истрага во 2016 година за потенцијална координација меѓу кампањата на Трамп и руската влада за влијание врз изборите.
Трамп го отпушти Коми во 2017 година на почетокот на неговиот прв мандат, откако Коми јавно потврди дека Трамп е под истрага.
Истрагата потоа ја презеде поранешниот специјален советник Роберт Милер, кој гонеше неколку соработници на Трамп, но не пронајде докази за криминално договарање меѓу кампањата на Трамп во 2016 година и Русија.
Трамп со години се спротивставува на истрагата и постојано ја отфрла како „руска измама“.
Извештајот на ЦИА објавен минатата недела пронајде недостатоци во проценката на американската разузнавачка служба за руското мешање во изборите во 2016 година, но не го оспори нејзиниот заклучок дека рускиот претседател Владимир Путин се обидел да го сврти гласањето во корист на Трамп.