Врховниот командант на иранската армија ги повика оперативните штабови да ги следат движењата на САД и Израел со најголема прецизност и „од момент до момент“ со цел да се спротивстават на можна копнена инвазија, пишува иранската државна новинска агенција ИРНА.
Во видео објавено од агенцијата, началникот на вооружените сили, Амир Хатами, е снимен за време на состанок со други воени лидери.
Агенцијата ИРНА ги сумираше клучните пораки од неговото обраќање.
„Ако непријателот се обиде да спроведе копнени операции, ниту еден од неговите војници не смее да преживее“, се наведува во резимето на зборовите на Хатами.
„Неопходно е да се следат движењата и дејствијата на непријателот со најголема прецизност, од момент до момент, и да се спроведат планови за спротивставување на методите на напад на непријателот“, се додава во него.