Силни експлозии одекнаа низ Тел Авив во саботата навечер по иранскиот напад.
И покрај добро познатиот израелски систем за противвоздушна одбрана наречен „Железна купола“, не беа пресретнати сите ракети.
Повеќе од 20 лица беа повредени.
Една жена, која беше во критична состојба, набрзо им подлегна на повредите, додека уште две лица беа сериозно повредени.
Три лица добија умерени повреди, а 16 беа полесно повредени.
Ракетите паднаа на најмалку две локации во областа на Тел Авив, каде што беа директно погодени станбени згради.
Командантот на округот Тел Авив потврди дека се погодени две куќи, истакнувајќи дека станува збор за „сериозна сцена“ и дека спасувачките екипи веднаш почнаа да ги пребаруваат урнатините.
Пет лица беа евакуирани од една зграда, додека потрагата по оние што можеби се закопани сè уште е во тек.
Службите за итни случаи брзо интервенираа на терен и воспоставија пункт за лекување на повредените.
Според болничарите, сцената беше хаотична – густ чад над станбените згради, запалени автомобили и големо уништување.
Најтешко повредените беа префрлени во болници, додека спасувачките екипи заедно со пожарникари, полиција и воени единици продолжија да го пребаруваат подрачјето и да им помагаат на жртвите.
Нападот вклучи сирени во поголемиот дел од земјата, вклучувајќи го централниот и северниот дел на Израел и Ерусалим.
Се проценува дека биле лансирани околу 16 ракети, осум кон Израел, две кон Обединетите Арапски Емирати, две кон Катар и две кон Јордан.
Потоа Иранската револуционерна гарда објави дека станува збор за нови бранови напади насочени кон воените и безбедносните цели на САД и Израел, пишува „Израел Национал Њуз“.