Иран започна нови напади врз земјите околу Персискиот Залив, а сирени за предупредување за дојдовни ракети се огласија рано утрово во Дубаи, Обединетите Арапски Емирати и Бахреин, објави АП.
Саудиска Арабија соопшти дека уништила два дрона над својот источен регион богат со нафта, а Националната гарда на Кувајт соопшти дека соборила шест дрона.
Покрај испукувањето ракети и дронови врз Израел и американските бази во регионот, Иран, исто така, ја таргетираше енергетската инфраструктура во соседните земји од почетокот на војната на 28 февруари, што, во комбинација со неговата контрола врз Ормутскиот теснец, доведе до пораст на светските цени на нафтата.
Како што конфликтот се прошири во регионот, Израел започна повеќекратни напади на почетокот на март против проиранската милитантна група Хезболах во Либан, која претходно испука ракети врз Израел.
Проиранските милиции во Ирак, исто така, започнаа напади врз американските бази во земјата од почетокот на конфликтот, а рано утрово една од тие милиции, 40-та бригада на Народните мобилизациски сили во градот Киркук, беше погодена во воздушен напад во кој беа убиени најмалку пет милитанти, а ранети уште четворица, соопштија официјални лица, кои сакаа да останат анонимни.
Не е објавено кој стои зад нападот.
Според официјални лица, од почетокот на војната, најмалку 1.230 лица се убиени во Иран, најмалку 397 во Либан и 11 во Израел.
Вкупно седум припадници на американската армија загинаа.