Иран вчера и денеска нареди прво речиси целосно затворање на земјата поради рекордни горештини.
Банките, училиштата, универзитетите, јавните канцеларии и некои приватни компании се затворени два дена.
Во многу региони температурите достигнаа невидени височини од почетокот на јули, особено на југот на земјата, каде што надминаа 50°C.
„Со оглед на рекордните температури и за заштита на јавното здравје, Владата го прифати предлогот на Министерството за здравство среда и четврток да се прогласат за државни празници во целата земја“, напиша на Твитер владиниот портпарол Али Бахадори Јахроми.
Иранските власти објавија дека бројот на посети на болниците во Иран е тројно зголемен поради топлотниот бран.
Службите за итни случаи во многу градови во земјава веќе неколку дена се во готовност.
Нема струја поради клима уредите
И покрај официјалните изјави кои ги објаснуваат исклучувањата како топлина, има многу индиции дека одлуката е поврзана со недостигот на струја во земјата.
Ова го потврди иранскиот дневен весник „Пајаме Ма“, повикувајќи се на „добро информиран извор“ во своето издание од 1 август.
„Покрај порастот на температурите, одлуката за затворање на земјата се должи и на падот на производството на електрична енергија“, се наведува во изданието.
Весникот наведува и пример на две електрани, Карун 3 и 4, лоцирани на запад од земјата, кои беа исклучени од мрежата поради многу голема побарувачка, особено како резултат на зголемената употреба на климатизација.
Во Иран, многу лошата состојба на дотраената и неисправна инфраструктура доведе до чести исклучувања на електраните, особено оваа година.
Прекини на струја и вода се регистрирани од јуни во Техеран и другите градови во земјата, понекогаш и по 10 часа.