Иранските власти денеска ги осудија новите санкции што им ги воведе Европската унија (ЕУ) поради задушувањето на протестите што го потресуваат Иран од средината на септември.
Во понеделникот ЕУ воведе нова рунда санкции кон Иран бидејќи се противи на начинот на кој се решаваат немирите во Иран.
Протестите во Иран беа започнати на 16 септември, денот кога Махса Амини (22) почина во болница, каде што беше ставена во тешка состојба по нејзиното апсење на 13 септември во Техеран поради „носење несоодветна облека“ и непочитување на иранскиот строг кодекс за облекување на жените. Нејзината коса се гледала под шалот.
Неколку стотици луѓе загинаа за време на протестите, вклучително и неколку десетици припадници на безбедносните сили. Уапсени се неколку илјади луѓе.
„Иако силно се противи на воведувањето на неприфатливи и неосновани санкции, Иран сепак смета дека дијалогот со ЕУ треба да се заснова на почитување, доверба и заеднички интерес“, соопшти денеска иранското Министерство за надворешни работи.
ЕУ воведе санкции против воени функционери, свештеник, неколку новинари, како и осум производители на беспилотни летала осомничени дека ја снабдувале Русија со дронови.
Иранските власти постојано негираа дека испратиле дронови во Русија.
„Основната позиција на Иран во украинската криза е да го поддржи територијалниот интегритет на Украина. Иран верува дека конфликтот може да се стави крај со политички решенија“, се додава во соопштението на иранското министерство.