Бројот на жртви во израелскиот напад врз основно училиште за девојчиња во градот Минаб, во јужната иранска покраина Хормозган, се искачи на 40, објавува иранската државна новинска агенција ИРНА.
Според агенцијата, училиштето било погодено за време на воздушните напади на САД и Израел врз ирански цели, како дел од поширока воена операција што предизвика ненадејна ескалација на конфликтот.
Во исто време, израелската војска соопшти дека погодила „стотици ирански воени цели“, вклучувајќи и ракетни лансери, за време на воздушните напади во западните делови на Иран.
Се додава дека израелските воздухопловни сили истовремено дејствуваат за пресретнување на иранските одмазднички напади.
Американски функционер изјави за Ал Џезира дека САД ќе продолжат со „обемни“ воздушни и морски напади врз Иран, нагласувајќи дека операциите имаат за цел демонтирање на безбедносниот апарат на Иран.
Според него, нападите во моментов се ограничени на цели во Иран, но вклучуваат директно учество на американските воздухопловни сили, кои дејствуваат во координација со израелската армија.
Нападите се дел од најшироката американско-израелска воена операција против Иран во последниве години, бидејќи Техеран истовремено лансира ракетни напади врз израелски и американски цели низ целиот регион, зголемувајќи го ризикот од поширок регионален конфликт.