Ирански ракети и дронови погодија цели во Израел и земјите од Персискиот Залив во вторник наутро, додека чад се издигаше од центарот на Тел Авив, и покрај тврдењата на американскиот претседател Доналд Трамп дека САД се во преговори со Иран за завршување на конфликтот, објави денес Асошиејтед Прес (АП).
Трамп претходно го одложи ултиматумот до Техеран за отворање на стратешкиот Ормутски Теснец или американските сили ќе ги нападнат иранските електрани, што привремено ги намали цените на нафтата пред тие да се вратат.
Брент се тргуваше со околу 104 долари за барел во утринската трговија, повеќе од 40 проценти над нивото пред војната на 28 февруари.
Иранските напади врз Израел се случија во неколку бранови рано во вторник.
Експлозијата одекна во центарот на Тел Авив, а чад се издигаше од станбена зграда во која прозорците на неколку ката беа искршени.
Четири лица беа полесно повредени, а спасувачките служби бараат можни жртви.
Во исто време, израелската војска ги нападна јужните предградија на Бејрут, таргетирајќи ја инфраструктурата поврзана со либанскиот Хезболах, ирански сојузник.
Најмалку две лица загинаа во напад врз станбена зграда југоисточно од либанската престолнина, објави либанското Министерство за здравство.
Во Кувајт, остатоци од воздушната одбрана ги оштетија далноводите и предизвикаа делумни прекини во снабдувањето со електрична енергија.
Сирени за тревога се огласија во Бахреин откако Саудиска Арабија соопшти дека уништила 19 ирански дронови насочени кон богатата со нафта Источна провинција.
Трамп првично постави рок до понеделник вечерта (вашинтонско време) за Иран повторно да го отвори Ормутскиот теснец, низ кој минува значителен дел од светската нафта.
После тоа, тој го одложи рокот за пет дена, наведувајќи дека дискусиите се во тек.
Сепак, Иран категорично негира какви било преговори.
Претседателот на иранскиот парламент, Мохамад Багер Калибаф, изјави на социјалната мрежа X дека „нема преговори со САД“ и дека тоа се „лажни вести“ што ги манипулираат финансиските и нафтените пазари.
Израелскиот премиер Бенјамин Нетанјаху рече дека Израел продолжува да ги напаѓа Иран и Либан „без оглед на размислувањата на САД за прекин на огнот“.
„Доаѓаат уште“, рече тој кратко.
Во последните денови, иранскиот министер за надворешни работи, Абас Арагчи, разговараше со колеги од Азербејџан, Египет, Оман, Пакистан, Русија, Јужна Кореја, Турција и Туркменистан.
Иранските претставници изразуваат скептицизам во врска со мотивите на Трамп, потсетувајќи дека претходните преговори беа во тек кога САД и Израел започнаа изненадувачки напади врз нуклеарните постројки на Иран и други цели.
Војната започна на 28 февруари со американско-израелски напади. Досега, повеќе од 1.500 луѓе загинаа во Иран, 15 во Израел, додека најмалку 13 американски војници загинаа, заедно со десетици цивилни жртви во окупираниот Западен Брег и земјите од Персискиот Залив.
Трамп претходно се закани дека ќе ги „уништи“ иранските електрани ако теснецот не се отвори, што би можело да остави милиони луѓе без струја и да ги загрози постројките за десалинизација што го снабдуваат Заливот со вода за пиење.
Иран предупреди дека во случај на американско истоварување на трупи, би можел да го минира целиот Персиски Залив.
Аналитичарите во Центарот „Соуфан“ забележуваат дека одложувањето може да биде поврзано со пристигнувањето на илјадници американски маринци во регионот, што отвора шпекулации за можен обид за заземање на островот Карг, клучен за извозот на нафта на Иран.
САД веќе го бомбардираа островот пред повеќе од една недела, но ја оставија нафтената инфраструктура недопрена.
Иран дозволи мал број бродови да поминат низ Ормутскиот теснец, но објави дека ќе продолжи да ги таргетира бродовите поврзани со САД, Израел или нивните сојузници.