Јеменската милитантна група Хути денеска соопшти дека истрелала неколку балистички проектили врз британскиот разурнувач ХМС Дајмонд, што британското Министерство за одбрана го демантираше.
Во соопштението на групата Хути се наведува дека нападот врз разурнувачот бил „прецизен“, но не се наведува дали е направена некаква штета.
„Овие тврдења не се точни“, изјави портпаролот на британското Министерство за одбрана, негирајќи ги наводите за напад, пренесе Ројтерс.
Според групата, погодени се и трговските бродови „Нордернеј“ и „Тавиши“, а на „Нордернеј“ избувнал пожар.
Нападите со ракети и беспилотни летала на јеменската група Хути во Црвеното Море и Аденскиот Залив започнаа во ноември минатата година и ја нарушија глобалната трговија.
Многу големи бродски компании ја избегнуваат областа и испраќаат бродови што пловат меѓу Азија и Европа на многу подолг пат околу јужна Африка, што ги зголеми трошоците за испорака.
Хутите велат дека ги извршуваат нападите во знак на солидарност со Палестинците и го повикуваат Израел да ја прекине војната против Хамас во Газа.