Повеќе од 140 жени низ Франција пријавиле дека биле нападнати со инјекции за време на музичкиот фестивал Fête de la Musique.
Како што пишува германскиот „Билд“, станува збор за шокантен бран напади што погоди бројни француски градови, вклучувајќи го и Париз, каде што е регистриран најголем број случаи.
Секоја година во јуни, фестивалот „Fête de la Musique“ ги исполнува улиците и плоштадите на европските градови со музика и прослава.
Сепак, овогодинешното издание, особено во Франција, беше обележано со невидено насилство.
Според податоците од француското Министерство за внатрешни работи, вкупно 145 жени пријавиле дека биле нападнати, а повеќето случаи се регистрирани во Париз, каде што фестивалот е основан во 1982 година.
Меѓу нападнатите има малолетни девојчиња, а најмалку 21 жртва доаѓа од главниот град.
Напади се случиле и во други градови, вклучувајќи го Асниер-сур-Сен, северозападно од Париз, каде што осум млади жени биле нападнати на градскиот плоштад.
Им помогнал Црвениот крст, а шест од нив поднеле пријава.
Случаи се пријавени и во Мец и Гренобл.
Некои жртви завршија во болница, каде што се вршат токсиколошки анализи за да се утврди точно што имало во инјекциите.
Францускиот весник „Ле Паризиен“ пишува дека некои жени се пожалиле на гадење и општа слабост по нападот.
Француските власти објавија дека досега се уапсени дванаесет лица, вклучувајќи четворица осомничени во западниот француски град Ангулем, кои се осомничени за напад врз околу 50 лица.
Германскиот „Билд“ и францускиот весник „Л’Индепендан“ објавуваат дека повици за напади циркулирале на социјалните мрежи уште пред почетокот на фестивалот, што ги вознемирило и исплашило многу жени.
Властите претходно ги предупредиле учесниците на фестивалот за можни опасности, но сè уште не е познато кој стои зад тие повици.