Лидерот на крајната десница Герт Вилдерс во вторник објави дека неговата Партија за слобода (PVV) ја напушта владејачката коалиција, ставајќи ја во прашање стабилноста на десничарската влада во Холандија.
Вилдерс рече дека неговите коалициски партнери не се подготвени да ги прифатат неговите клучни барања во врска со целосно запирање на миграцијата за азил, што тој го побара од нив минатата недела.
„Нема потпис на нашите планови за азил. PVV ја напушта коалицијата“, рече Вилдерс на социјалната мрежа X (поранешен Твитер), пренесува Ројтерс.
Неговата одлука може да доведе до пад на владата формирана по изборите на кои PVV постигна историски успех, но и да предизвика нови политички превирања во земјата, особено во однос на миграциската политика.