Холандските власти уапсија двајца 17-годишници осомничени за шпионажа за руската разузнавачка служба, во она што официјалните лица го нарекуваат „уникатен случај“ во Холандија.
Тинејџерите наводно извршиле хакерски задачи во Хаг, поминувајќи покрај седиштето на Европол, Евроџаст и канадската амбасада со „Wi-Fi трагач“ за мапирање мрежи и пресретнување податоци, а биле контактирани преку апликацијата Телеграм, објавува „NL Times“.
Апсењата следеа по дојава од холандската разузнавачка служба (AIVD).
Едниот осомничен останува во притвор 14 дена, додека другиот е во домашен притвор со електронски мониторинг.
Експертите предупредуваат дека случајот е сериозен и дека осомничените се соочуваат со затворска казна до осум години.
Истражувачот на руските операции, Барт Шурман, истакна дека странските сили често вработуваат „агенти за еднократна употреба“ преку анонимни сметки на Телеграм, што го отежнува нивното следење.