Холандската авиокомпанија KLM објави привремено прекинување на летовите помеѓу Амстердам и аеродромот Бен Гурион во Тел Авив, почнувајќи од 1 март, поради зголемените тензии со Иран и можноста за воен конфликт.
„KLM континуирано ја прилагодува својата глобална мрежа врз основа на побарувачката на пазарот и оперативните околности. Во моментов не е комерцијално или оперативно изводливо KLM да управува со летови до Тел Авив“, се вели во соопштението објавено од The Times of Israel.
KLM вели дека „ќе продолжи да ги следи случувањата и ќе ја преиспита одлуката во зависност од околностите“.
Во соопштението се наведува дека на патниците кои веќе купиле билети ќе им биде понудена опција за пререзервација на летот за друг датум или враќање на парите.
Соединетите Американски Држави и Иран преговараат за нуклеарната програма на Иран, со изрично барање на САД дека Иран не смее да добие нуклеарна бомба, а американскиот претседател Доналд Трамп постојано изјавува дека, доколку не се постигне дипломатско решение, ќе употреби воена сила, пренесува Танјуг.