Со Хари Мата Хари вечерва на градскиот плоштад во Куманово се очекува кулминација на Ноемвриските денови со кои се одбележуваат 499 години од формирањето и 74 години од ослободувањето на градот.
Низа настани ќе се одржат во текот на денешниот ден по повод „11 Ноември“. Рано утринава во 7 часот започна турнирот во риболов на реката Пчиња. Во 11 часот е откриена спомен плоча во селото Пелинце, а веќе во 12 започнува турнир на пинг понг ветераните во СОУ Гимназија „Гоце Делчев“.
Атлетската ноќна трка започнува во 18:20 часот на која голем број атлетичари и аматери од Куманово, но и останатите градови ќе трчаат низ кумановските улици.
Главната прослава започнува во 20:30 часот, кога свој настап ќе имаат првин кумановските естрадни уметници Мартинијан Кириловски, Ивона Јовановиќ, Марио Арангеловски и Мартија Станојковиќ. По нивните настапи се очекува и ѕвездата на вечерта Хари Мата Хари, а во меѓувреме и обраќање на градоначалникот Максим Димитриевски.
Свеченостите продолжуваат и утре. Во 11 часот на Спомен Костурница бројни делегации ќе положат свежо цвеќе, а во 12 часот во Центарот за култура „Трајко Прокопиев“ ќе се одржи и свечената седница на Советот на Општина Куманово каде ќе се доделат и Ноемвриските награди, а евроамбасадорот Самуел Жбогар ќе го добие признанието Почесен граѓанин на Општина Куманово.