Врховниот лидер на Иран, ајатолахот Али Хамнеи, денес изрази сомнеж дека нуклеарните преговори со Соединетите Американски Држави ќе доведат до договор, објави иранската новинска агенција „Мехр“.
„Не мислам дека нуклеарните преговори со САД ќе донесат резултати. Не знам“, рече Хамнеи во говорот во чест на иранскиот претседател Ебрахим Раиси, кој почина минатата година, објави Ројтерс.
Иран доби и моментално разгледува предлог за петтата рунда нуклеарни преговори со САД, изјави заменик-министерот за надворешни работи на земјата, Казем Гарибабади.
„Добивме предлог за следната рунда индиректни преговори со САД и го разгледуваме“, рече тој.
Два дена претходно, иранскиот министер за надворешни работи, Абас Аракчи, изјави дека датумот за петтата рунда нуклеарни разговори меѓу Иран и САД е одреден, но се чека одобрување и наскоро ќе биде објавен.
Во мај 2024 година, иранскиот претседател Ебрахим Раиси загина во хеликоптерска несреќа во планинскиот регион на северозападен Иран, во близина на границата со Азербејџан.
Истрагата покажа дека несреќата била предизвикана од лоши временски услови, вклучително и густа магла.
Освен Раиси, загинаа уште седум лица, меѓу кои и иранскиот министер за надворешни работи Хосеин Амир-Абдолахијан.