Полицијата во Норвешка се сомнева дека руски хакери стојат зад саботажата на браната на југозападниот дел од земјата во април оваа година, изјавија денес службеници за локалните медиуми.
Директорката на Службата за безбедност на норвешката полиција, Беате Гангас, предупреди дека кибер нападите врз западните земји стануваат сè почести и дека тие поттикнуваат страв и немири.
Денес, заедно со шефот на Норвешката разузнавачка агенција, таа зборуваше на конференцијата „Хибридни напади врз Норвешка: дали сме во војна?“ и предупреди дека инцидентите во таа и други европски земји би можеле да се влошат.
Службеници на западноевропските земји ги обвинија Русија и нејзините сојузници за десетици инциденти, како што се вандализам, обиди за атентат и палење од почетокот на војната во Украина во февруари 2022 година, а експертите веруваат дека нападите стануваат сè поагресивни.
Во април, хакерите што работат во Норвешка добија пристап до дигитален систем што далечински контролира еден од вентилите на браната во регионот Бремангер и го отворија за да го зголемат протокот на вода, објави Норвешката радиотелевизија (NRK).
Вентилот бил отворен околу четири часа, но не претставувал опасност за околното подрачје, објави НРК.
По инцидентот, на Телеграм е објавено видео од контролната табла на браната, на кое се гледа обележување на руска сајбер-криминална група, изјави обвинителката Недребе Мишелсен.
Денешното соопштение на норвешката полиција е првпат од почетокот на војната во Украина службениците јавно да наговестат дека руски хакери се одговорни за нападот врз браната.