Гувернерот на американската држава Северна Дакота, Даг Бургум објави дека влегува во трката за републикански претседателски кандидат за изборите во 2024 година.
Шеесет и шестгодишниот Баргам, поранешен софтверски претприемач, се приклучува на долгата листа на претенденти за републиканскиот претседателски кандидат, меѓу кои според анкетите на јавното мислење води поранешниот американски претседател Доналд Трамп.
Гувернерот на Северна Дакота, четвртата најмалку населена држава во САД, ја објави својата кандидатура во Wall Street Journal и ја започна кампањата во неговиот роден град Фарго, кој е блиску до малиот земјоделски град Артур каде што пораснал.
„Не треба да изненадува што цел живот сум воден од вредностите на малите градови. И искрено, големите градови би можеле да користат повеќе идеи и повеќе вредност од малите градови во моментов“, рече тој пред толпата поддржувачи.
Тој зборуваше под транспарент на кој пишуваше „Нов лидер за економија што се менува“, слоган што првпат го користеше во неговата успешна кампања за гувернер во 2016 година.
Тој беше реизбран за гувернер во 2020 година и има право да се кандидира за трет мандат во 2024 година.
Во 1983 година ја основа компанијата Great Plains Software, која ја купи Мајкрософт во 2011 година, а Баргам остана потпретседател на Мајкрософт до 2007 година.
Неговото прво појавување во кампањата во поранешна црква во Фарго беше посетено од многу истакнати републиканци од Северна Дакота, вклучително и двајца поранешни гувернери и водечки членови на администрацијата на државата.
Многумина се фотографираа на сцената пред црвено-бело-синиот знак „Даг Баргам за Америка“.
Баргам е малку познат надвор од Северна Дакота и се соочува со огромен предизвик во полето на претенденти во кои доминираат Трамп и попознатиот гувернер во таа трка, Рон Десантис од Флорида.
Тој не е ниту најистакнатиот кандидат кој денеска ја започна претседателската кампања. Поранешниот американски потпретседател Мајк Пенс денеска во државата Ајова ја започна кампањата за републиканскиот претседателски кандидат.
Заедно со Трамп, Де Сантис и Пенс, во трка за кандидатурата се и поранешната амбасадорка на САД во ОН Ники Хејли, сенаторот од Јужна Каролина Тим Скот, поранешниот гувернер на Њу Џерси Крис Кристи, поранешниот гувернер на Арканзас Ејс Хачинсон, водителот Лери Елдер и претприемачот Вивек Рамасвами.
Републиканскиот претседателски кандидат треба да се соочи со демократскиот претседател Џо Бајден во ноември 2024 година.