Во обид да го стимулира економскиот раст, Грција воведе шестдневна работна недела за одредени сектори од економијата.
Новиот закон, кој стапи на сила во јули, се однесува само на компаниите кои работат 24 часа, а на вработените им дава можност наместо 40 да работат 48 часа неделно.
Прекувремената работа е незадолжителна за работниците, кои за тоа добиваат дополнителни 40 отсто, но тоа не се однесува на работните места во туризмот и прехранбената индустрија.
Потегот на грчката влада е во контраст со трендовите во другите делови на Европа и САД, каде четиридневните работни недели се сè почести.
Компаниите кои го прават ова тврдат дека тоа ја зголемува продуктивноста и благосостојбата на вработените.
Властите во Грција се надеваат дека шестдневната работна недела ќе помогне во борбата против непријавената работа и даночното затајување, пишува грчкиот јавен сервис.
Грчкиот премиер Киријакос Мицотакис вели дека „суштината на законот е про-работник и длабоко ориентиран кон (економски) раст“, пишува Гардијан.
„И тоа ја доведува Грција во линија со остатокот од Европа“, рече Мицотакис.
„Директивата за работно време“ на Европската унија бара од земјите-членки да им гарантираат на работниците ограничување на работното време од 48 часа неделно, со платена прекувремена работа.
Би-би-си го контактираше грчкиот министер за труд Ники Керамеус за коментар.
Глобалната финансиска криза од доцните 2000-ти имаше катастрофален ефект врз Грција – високата јавна потрошувачка и широко распространетата даночна евазија ја оставија земјата во огромни долгови.
Мицотакис, пак, ја презеде заслугата за закрепнувањето на грчката економија, откако економската криза ја принуди земјата три пати да бара меѓународна финансиска помош.
Меѓутоа, кога станува збор за бројот на работни часови во седумдневен период, Грција се чини дека се движи во спротивна насока од другите европски земји.
Од пандемијата на корона вирусот, многу компании прифатија флексибилни работни модели и четиридневни недели, а на работниците не им е лишен процент од платата.
Испитувањата на четиридневната работна недела во Исланд беа поздравени како „неверојатен успех“ и многумина се префрлија на таков систем таму, покажува истражувањето.
Истражувачите тврдат дека продуктивноста на повеќето работни места или останала иста или се подобрила.