Грчките противпожарни сили сè уште се борат од неколку активни фронтови во регионите на Ахаја, на островот Хиос, во Превеза, на Закинтос, како и во Илија.
Властите започнаа истраги поради сомневање за подметнување пожар, додека на сила е предупредување за многу висок ризик од нови пожари во неколку делови од земјата, пишува „Катимерини“.
На островот Хиос, пожарот што гори веќе три дена е сè уште активен во недостапните делови на северозапад и североисток.
Повеќе од 150 електрични столбови беа изгорени, а бројни населби останаа без струја, вклучувајќи ги Волисос, Потамија, Агиос Гала, Керамос и Камбија.
Враќањето на електричната мрежа може да трае повеќе од една недела.
Во гаснењето учествуваат сите локални противпожарни единици, волонтери и засилувања од Митилена и Атина, како и два авиони и шест хеликоптери.
Во Ахаја, пожарот е сè уште активен со повеќе жаришта.
Пет авиони и шест хеликоптери дејствуваат на терен, а прелиминарните истраги укажуваат на можни искри од далноводи, поради силен ветер и ниски гранки.
Помали пожари сè уште се регистрираат во Филипијадес, иако нема активен фронт.
Во регионите Ксирохори и Илија, новите пожари што избувнаа се ставени под контрола, а на терен има 45 пожарникари, две пешадиски групи, 15 возила и два авиони.
Пожарите на Закинтос моментално се под контрола, но противпожарната бригада останува во готовност за евентуално повторно палење.
Сведоците им доставија на властите докази што укажуваат на осомничениот пироман, познат на полицијата од претходни инциденти во истата област.
На Закинтос, осомничениот е 59-годишен маж кој беше уапсен минатата година за предизвикување пожар.
Полицијата и противпожарните служби ги истражуваат причините за неколку сомнителни пожари.
Во Воница, три пожари избувнаа во рок од неколку минути, истрагата е во тек.
На Хиос и Патрас се анализираат сведоштва и видеа кои укажуваат на можно намерно палење пожари.
Генералниот секретаријат за цивилна заштита издаде предупредување за многу висок ризик од пожар за регионите – Атика, Евија, Беотија, Арголис, Фтиотида, Коринт, Тасос, Родопи, Еврос, Ксанти, Лемнос и Самотрака.