Во австралиската држава Викторија се води голема потера по маж обвинет за убиство на двајца полицајци и повредување на трет на неговиот имот.
Полицијата потврди дека станува збор за Деси Берд Фримен (56), теоретичар на заговор и самопрогласен „суверен граѓанин“ кој го отфрла авторитетот на државата и законот, пишува BBC News.
Фримен има долга историја на пресметки со полицијата, а неговата омраза кон властите е добро документирана преку онлајн објави, видеа и судски записи.
Тој ги нарекол полицајците „терористички бандити“, ги споредил со нацисти и еднаш се обидел да уапси судија на суд.
Ковид и теории на заговор
Помалку од една недела пред пукањето, неговата сопруга, Мали, ѝ рекла на соседката дека е загрижена за неговото однесување.
Мештаните им кажале на медиумите дека таткото на две деца некогаш бил љубезен, но за време на пандемијата на Ковид, неговото однесување станало непредвидливо, а неговите ставови екстремни.
Фримен, роден како Дезмонд Кристофер Филби, стана јавна личност поради своите ставови за здравствената криза.
Одбивал да носи маски, се спротивставуваше на вакцинацијата и станувал сè погласен во својата недоверба кон владините мерки и карантини, кои беа особено долги и строги во Викторија.
„Тој беше против сè што имаше врска со тоа“, изјави еден локален жител за Сиднеј Морнинг Хералд.
„Од прилично обичен селски човек… нормален човек што го гледавте постојано во локалниот фудбалски клуб, стана доста чуден. Се фрли во зајачка дупка и некако исчезна од радарот.“
„Движење на суверени граѓани“
Австралиските медиуми објавија дека Фримен се идентификува како „суверен граѓанин“, член на движење чии следбеници веруваат дека се имуни на владините закони.
Движењето цветаше во Австралија за време на карантинот во 2020 година.
Шефот на полицијата на Викторија, Шејн Патон, во тоа време рече дека полицајците биле принудени да „скршат прозорци на автомобили и да ги извлечат луѓето за да дадат информации“ затоа што одбиле да соработуваат.
Меморандум на австралиската федерална полиција од 2023 година вели дека движењето имало „скриен капацитет да поттикнува насилство“.
Во 2021 година, Фримен бил вмешан во обид да се суди тогашниот премиер на земјата, Даниел Ендрус, за предавство.
Тој бил уапсен пред судот во Викторија, каде што се собраа околу 250 демонстранти. На видеото од апсењето, се слуша како вели: „Ќе измислат некои [пцовки] за мене, мојот пријател, затоа што им се спротивставив“. Случајот подоцна беше отфрлен.
Проблеми со законот
Со години, Фримен се влечеше низ судовите, главно за сообраќајни прекршоци. Неговото однесување во судницата јасно покажуваше презир кон авторитетот.
„Срам да ви е!“, извика минатата година на судија кој одби да ги отфрли обвиненијата против него.
Тој тврдеше дека бил под притисок кога полицијата го запрела и дека дејствувал во самоодбрана снимајќи ги.
Тврдеше дека се плашел дека можеби ќе се обидат да го уапсат, што би било „напад и киднапирање“.
„Се чувствував загрозен и прогонуван… дури и глетката на полицаец или полициски автомобил… тоа е како преживеан од Аушвиц да гледа нацистички војник“, рече Фримен, според судските документи.
Во истиот документ се наведува дека тој ги нарекол полицајците „проклети нацисти“, „Гестапо“ и „терористички бандити“.
Во еден од неговите најбизарни испади, тој се обидел да уапси судија и полицаец за време на спор околу пристапот до национален парк.
„Се однесувате угнетувачки“, му рекол на судијата.
„Мора да се тргнете настрана, а сега сте во мој притвор и уапсени. Не сте слободни да си заминете.“ Потоа му наредил на полицаецот да го уапси судијата, а кога судијата одбил, Фримен рекол дека и тој е уапсен. Двајцата го игнорирале.
Вешт познавач на дивината
Соседите велат дека Фримен и неговото семејство живеат во автобус на имот од 20 хектари на периферијата на Порепунка.
Мештаните рекле дека мислеле дека неколку луѓе живеат на имотот, во некаков ограден комплекс со голема порта и камери за надзор.
Пукањето наводно се случило кога полицијата влегла во автобусот за да го претресе. Фримен последен пат бил виден како бега во блиската густа грмушка.
Полицијата наведува дека е свесна дека тој е искусен познавач на дивината, што претставува голем предизвик за потрагата.
„Тој добро ја познава грмушката и таму има пештери, па мислам дека ќе помине некое време пред да го најдат“, изјавил соседот за ABC.
Полицијата предупредила дека Фримен е „тешко вооружен“, а медиумите известуваат дека се верува дека го украл оружјето на полицајците што ги застрелал.
Познат во заедницата
Семејството Фримен – Деси, Мали и нивните деца – живеат во областа со години и се добро познати во малата заедница. Неговата сопруга, Мали, ги учи децата музика и работи во локален супермаркет.
Во 2018 година, семејството се појави во телевизиска емисија каде што се пожалија на своите „соседи од пеколот“ на претходниот имот.
„Мали и нејзиното семејство се многу љубезни, многу фини луѓе“, изјавил за емисијата сосед чии внуци ги посетувале часовите по музика на Мали.