Разузнавачката служба на Данска им помогнала на САД да ги шпионираат европските политичари, вклучително и германската канцеларка Ангела Меркел од 2012 до 2014 година, се вели во извештајот објавен од данските медиуми.
Разузнавачката служба за одбрана (ФЕ) соработувала со Американската агенција за национална безбедност (НСА) при собирање информации, објави данскиот јавен сервис „Данмаркс радио“, а пренесува Би-Би-Си.
Шпионирани се службеници од Германија, Франција, Шведска и Норвешка, се вели во извештајот.
Во 2013 година, американскиот свиркач Едвард Сноуден прв објави информација дека НСА ја шпионирала Ангела Меркел.
Белата куќа не ги демантираше овие обвинувања во тоа време, но соопшти дека телефонот на германската канцеларка не бил прислушуван во тоа време и дека нема да биде прислушуван во иднина.
Во новиот извештај, кој е споделен со повеќе европски новински агенции, се вели дека НСА имала пристап до СМС-пораки и разговори на неколку истакнати службеници преку поврзување со дански интернет кабли во соработка со тамошната служба за одбрана.
Ова, наводно, му овозможило на американскиот сервис да собира податоци користејќи ги телефонските броеви на политичарите како параметри при пребарувањето, објави данскиот јавен сервис.
Покрај Ангела Меркел, мета биле и тогашниот германски министер за надворешни работи Франк-Валтер Штајнмаер и тогашниот лидер на опозицијата Пер Штајнбрик.
Данската министерка за одбрана Трине Брамсен, која наводно била информирана за случајот порано, за радиото „Данмаркс“ изјави дека „систематското прислушување на блиски советници е неприфатливо“.
НСА и данскиот сервис за ФЕ сè уште не ги коментираа последните извештаи во медиумите.