Главните берзански индекси на Волстрит во четвртокот го завршија тргувањето со големи загуби, што е најголем еднодневен процентуален пад од март 2020 година, бидејќи царините наметнати од американскиот претседател Доналд Трамп ги поттикнаа стравувањата од општа трговска војна и глобална рецесија.
Во шок што не е забележан од избувнувањето на пандемијата на коронавирус, која ги осакати економиите ширум светот, инвеститорите бегаат од ризични средства, барајќи ја безбедноста на државните обврзници, бидејќи Трамп наметна царина од 10 отсто за повеќето американски увози и многу повисоки давачки за десетици други земји.
Тарифите, кои би можеле да го нарушат глобалниот трговски поредок, означуваат остра промена од расположението пред само неколку месеци, кога ветувањето за про-бизнис политики под администрацијата на Трамп ги доведе американските акции до рекордни височини.
Распродажбата на акциите ја одразува новата економска реалност, со загриженост за тоа како другите земји ќе реагираат на царините на Трамп.
Кина вети одмазда, како и Европската унија, која се соочува со царина од 20 отсто.
Јужна Кореја, Мексико, Индија и неколку други трговски партнери посочија дека засега нема да возвратат бидејќи бараат отстапки пред тарифите да стапат на сила на 9 април.
Според прелиминарните податоци, индексот S&P 500 загуби 4,85 отсто од вредноста, додека Nasdaq падна за 5,99 отсто, а Dow Jones за 3,98 отсто.
Акциите на технолошките компании кои беа во пораст претрпеа голем пад откако го туркаа Вол Стрит до рекордни височини во изминатите неколку години.
Американските акции паднаа откако Трамп ја презеде функцијата во јануари, при што S&P 500 и Nasdaq веќе паднаа за 10 отсто од неодамнешните рекордни максимални вредности, влегувајќи во таканаречена корекција бидејќи инвеститорите ја земаа предвид економската штета од царините.
Сепак, нивото на царините што Трамп го објави во средата навечер ги надмина очекувањата, па веднаш по неговата објава почна дополнителен пад.
Трговците ги зголемуваат очекувањата дека Банката на федерални резерви ќе ги намали каматните стапки четири пати оваа година, почнувајќи со намалување за четвртина поен во јуни.
Големи падови доживеаја и компаниите кои продаваат чевли и облека, бидејќи Трамп воведе големи царини во земјите со големо производство, како Виетнам, Индонезија и Кина.
Загуби забележаа и големите банки како што се Citigroup, Bank of America и JPMorgan Chase & Co, бидејќи се чувствителни на економски ризици.
Индексот Расел 2000, кој вклучува помали американски компании, исто така изгуби 6,6 отсто, што ја нагласи загриженоста за здравјето на американската економија.