Во среда во Берлин, германскиот канцелар Фридрих Мерц ја обвини Русија за тероризам за најновите напади врз цивилни цели во Украина, на маргините од прославата на 70-годишнината од влегувањето на Германија во НАТО, каде што германските политичари ги истакнаа своите амбиции да преземат водечка улога во рамките на Атлантскиот сојуз, пренесува Хина.
„Синоќа бевме сведоци на најтешките бомбардирања и ракетни напади од почетокот на војната. Ова е тероризам насочен против цивилни цели. Тоа повеќе нема никаква врска со војна против воени цели“, рече Мерц по средбата со генералниот секретар на НАТО, Марк Руте.
На церемонијата по повод 70-годишнината од влегувањето на Германија во НАТО, Мерц нагласи дека неговата „влада ќе направи сè за да го направи Бундесверот најсилната конвенционална армија во рамките на Европската Унија, како што се очекува од нас како најголема европска економска сила“.
Според него, во наредните години, Германија ќе го предводи патот во „зајакнувањето на столбовите на НАТО во Европа“.
Решителност и заедништво
Мерц им рече на собраните гости, меѓу кои беше и хрватскиот министер за одбрана Иван Анушиќ, дека НАТО покажал решителност и единство во историските моменти.
„Овој сојуз дише, живее и ја носи нашата колективна безбедност“, рече тој.
Германскиот министер за одбрана Борис Писториус, исто така, најави зајакнување на улогата на Германија во рамките на НАТО.
„Руската агресија врз Украина дефинитивно го отфрли секое прашање за значењето на постоењето на НАТО… и ние заеднички ќе ја браниме секоја педа од територијата на НАТО“, рече германскиот министер за одбрана.
На 6 мај 1955 година, помалку од десет години по капитулацијата на нацистичка Германија, Германија стана 15-та членка на НАТО.