Германската јавност и дел од политичкиот естаблишмент повторно го поставуваат прашањето за безбедноста на нивните златни резерви во странство, особено во Њујорк, бидејќи се сомневаат во сигурноста на американскиот претседател Доналд Трамп и неговата администрација.
Германската федерација на даночни обврзници (BdSt) оваа недела побара од Бундесбанката и Министерството за финансии на Германија да го вратат златото од Соединетите Американски Држави, објавува Ројтерс.
„Трамп сака да ја контролира американската централна банка ФЕД, што значи дека може да се најде во позиција да влијае врз германските златни резерви што се таму. Тоа се наши пари и треба да се вратат дома“, рече потпретседателот на BdSt, Михаел Јегер, објавува Танјуг.
„Геополитичка реалност“
Претставникот за Европа, Маркус Фербер, од редовите на владејачките конзервативни христијански демократи, предупреди дека „Соединетите Американски Држави под Трамп се сè помалку сигурен партнер“ и дека Бундесбанката мора да ја прилагоди својата политика на „новите геополитички реалности“.
Германските јавни радиодифузери ZDF и ARD неодамна емитуваа извештаи за безбедноста на германското злато во Њујорк, што покажува дека оваа тема, која со години беше резервирана само за десницата и теоретичарите на заговор, сега добива внимание од пошироката јавност.
Бундесбанк чува речиси една третина од своите златни резерви – вкупно 3.352 тони, што е втор најголем владин депозит на злато во светот – во трезорот на ФЕД во Њујорк, кој датира од периодот на Студената војна.
Враќањето на Доналд Трамп во Белата куќа, неговите чести напади врз ФЕД и затегнатите односи со сојузниците предизвикаа нов бран загриженост во Германија, а сè повеќе тамошни функционери повикуваат на поголема диверзификација на златните резерви, додава агенцијата.