Германското Министерство за одбрана потврди дека Германија испраќа 13 војници во Гренланд.
Мисијата на Бундесверот ќе биде извидувачка мисија, треба да трае од 15 до 17 јануари, а германските војници одат таму на покана на Данска.
Транспортниот авион „Ербас Е400М“ ќе ги префрли во Нук во Гренланд, пишува Дојче Веле.
Како што е наведено од Берлин, целта е „да се истражи можен воен придонес што би ја поддржал Данска во гарантирањето на безбедноста во регионот, на пример во однос на капацитетот за поморско набљудување“.
Само неколку часа по неуспешниот самит на Гренланд во Вашингтон, првите специјални сили и извидувачки трупи од Европа пристигнаа во Гренланд во текот на ноќта.
Дански воен авион од типот „Херкулес“ слета во текот на ноќта на цивилниот аеродром во главниот град Нук.
Два автобуси пристигнаа во блискиот Арктички команден центар на данските вооружени сили со дански, но наводно, како што објави германскиот весник „Билд“, и со француски офицери и војници.
Покрај тоа, војници од Холандија, Канада, Шведска, Велика Британија и Норвешка наводно се на пат кон Гренланд.
Како што објавуваат германските медиуми, операцијата е координирана од Копенхаген, а не преку структурите на НАТО.
Причината е што нордиските земји се во Алијансата, а со тоа и Гренланд, под чија команда е седиштето во Норфолк, САД.
Сепак, оваа операција се одвива без учество на Американците.
Што се однесува до Германија, акцијата се спроведува под Министерството за одбрана и со водство на Канцеларијата на канцеларот.
Претседателот на САД, Доналд Трамп, во последните недели постојано повторуваше дека има намера да ја преземе контролата врз Гренланд, наведувајќи ги безбедносните проблеми и наводната закана од Русија и Кина.
Владата на САД не ја исклучи можноста за присилно преземање на данскиот остров.
Средбата на претставници на Данска, Гренланд и САД во Вашингтон во среда вечерта не доведе до договор за тоа како да се продолжи.
Данска и САД имаат „различни ставови“ по ова прашање, изјави данскиот министер за надворешни работи, Ларс Леке Расмусен, по состанокот, додавајќи: „Се согласуваме да не се согласуваме“.
Сепак, беше договорено да се формира работна група на високо ниво за да се испита дали може да се најде заеднички пристап по ова прашање.
Гренланд е автономен дел од Кралството Данска и затоа е членка на НАТО. Владата во Копенхаген ја отфрла можноста САД да го преземат Гренланд.
Германската влада јасно ги отфрли американските претензии кон Гренланд. Сепак, канцеларот Фридрих Мерц и министерот за одбрана Борис Писториус рекоа дека сакаат да соработуваат со САД за да го обезбедат арктичкиот регион од руската закана. Мерц нагласи дека тоа треба да се направи во рамките на НАТО.