За да можат Соединетите Американски Држави и Европската Унија да постигнат поширок трговски договор, Соединетите Американски Држави прво ќе мора да го спроведат договореното намалување на царинската стапка за увоз на автомобили произведени во Унијата, истакнува Германија.
На крајот на јули, САД и ЕУ постигнаа трговски договор со кој ќе се воведе царина од 15 проценти за увоз на повеќето европски стоки во САД, но голем број клучни детали, вклучувајќи ги царините за увоз на лекови и автомобили, сè уште се разработуваат.
Откако американскиот претседател Доналд Трамп објави повисоки царини во април, увозот на автомобили произведени во Европската Унија подлежи на царински давачки со стапка од 27,5 проценти.
Иако е постигнат прелиминарен договор, европските производители се плашат од ненадеен пресврт, бидејќи Трамп сè уште не издал извршна наредба за намалување на царините за автомобили.
За да се финализира трговскиот договор, потребно е итно намалување на царините за автомобили, предупреди германската влада, пренесува Хина.
„Поточно, царините за автомобили мора итно да се намалат, како што е договорено. Исто така, свесни сме за значителниот товар врз извозно ориентираната економија. Нашата улога е да продолжиме целосно да ја поддржуваме Европската комисија во овој процес“, изјави портпаролот на германската влада на прес-конференцијата.
Соединетите Американски Држави се главниот извозен пазар за автомобилската индустрија на Европската Унија, според податоците објавени од Евростат во јули, со дури една петтина удел во вкупната додадена вредност на европското производство на автомобили за странски пазари во 2023 година.
Автомобилската индустрија во ЕУ вработила вкупно 2,47 милиони работници во 2023 година, при што дури една третина склопувала автомобили наменети за странски пазари, а убедливо најголемиот број работници на извозни работни места биле вработени од германската автомобилска индустрија, покажаа податоците од Европскиот завод за статистика.