Британскиот премиер Кир Стармер е под зголемен притисок од министрите во неговата влада Велика Британија веднаш да ја признае Палестина како држава, објави „Гардијан“, повикувајќи се на неименуван британски министер.
„Веруваме дека признавањето на палестинската државност е важен симбол што може да се направи само еднаш. Ако не сега, тогаш кога?“, рече тој министер.
Лондонскиот весник објави дека Стармер бил повикан на разни состаноци на кабинетот во последните месеци од голем број министри Велика Британија да преземе водечка улога во признавањето на државата Палестина.
Британската влада претходно планираше формално да ја признае Палестина како дел од мировниот процес, но само во соработка со други западни земји и на „точка на максимално влијание“, но без да прецизира што точно значи тоа.
Порано овој месец, речиси 60 пратеници од Лабуристичката партија побараа Велика Британија веднаш да ја признае Палестина како држава, откако израелскиот министер за одбрана Израел Кац објави планови за насилно иселување на сите жители на Газа во бегалски камп во разурнатиот град Рафа.