Лидерите на Групата седум индустриски земји (Г7) го поддржаа договорот за прекин на огнот меѓу Израел и Хамас и ги повикаа да се вклучат конструктивно во преговорите за следните фази од договорот за да се обезбеди негова целосна имплементација и траен прекин на непријателствата.
„Ова е значаен развој што има потенцијал да обезбеди ослободување на сите преостанати заложници, дополнително да ја олесни итно потребната хуманитарна помош и да го отвори патот за цивилите да се вратат и да ги обноват своите домови и нивните животи“, се вели во соопштението на лидерите на Г7 објавено на веб-страницата на Европскиот совет.
Тие им се заблагодарија на Египет, Катар и САД за нивните „неуморни напори“ во посредувањето во овие преговори и ги повикаа сите страни да ги почитуваат условите од договорот.
Во исто време, тие го повикаа Иран и неговите полномошници да се воздржат од какви било понатамошни напади врз Израел и ја потврдија својата поддршка за безбедноста на Израел.
Тие исто така нагласија дека, имајќи предвид дека наскоро ќе стапи на сила прекинот на огнот, од клучно значење е да се искористи оваа можност за да се стави крај на „катастрофалната хуманитарна ситуација во Газа, каде што условите продолжуваат да се влошуваат“.
Тие побараа од сите страни да овозможат безбедно, брзо и непречено поминување на хуманитарната помош и да обезбедат заштита на цивилите, вклучително и хуманитарните работници.
Тие ја повторија својата поддршка за „кредибилен пат кон мирот што води до решение со две држави“.
Тие го осудија Хамас и неговиот „координиран напад врз Израел“ на 7 октомври 2023 година и изразија жалење за „десетиците илјади животи изгубени во тој брутален напад и неговите последици и огромното страдање на Палестинците и Израелците“.
Кабинетот на израелскиот премиер Бенјамин Нетанјаху рано утринава потврди дека преговарачките тимови на Израел и Хамас во Доха потпишале договор за прекин на огнот и ослободување на заложниците.
Првата фаза од договорот, која трае шест недели, вклучува постепено повлекување на израелските сили од Газа, како и ослободување на 33 Израелци, меѓу кои жени, деца и мажи постари од 50 години, како и двајца Американци – Кит Сигел и Саигуи Дикел Чин.
Преговорите за втората фаза од договорот ќе започнат 16 дена по почетокот на првата фаза, а таа фаза најверојатно ќе вклучи ослободување на сите преостанати израелски заложници кои ги држеше палестинската милитантна група Хамас, траен прекин на огнот и целосно повлекување на Израелски војници од Газа, во замена за ослободување на повеќе од 1.000 палестински затвореници.
Третата фаза ќе вклучува враќање на сите преостанати тела и почеток на реконструкција на Газа под надзор на Египет, Катар и Обединетите нации.