Борбениот авион „Мираж 2000“, кој Украина го доби од Франција, се урна во вторник поради дефект на опремата, објави украинската армија.
Ова е прва загуба на „Мираж“ откако почнаа да пристигнуваат во Украина на почетокот на оваа година.
„Имаше дефект на опремата, за што пилотот ја информираше контролата на летот“, се вели во соопштението на украинската армија објавено на Телеграм.
„Пилотот потоа дејствуваше професионално, како што се очекува во кризни ситуации, и успешно се катапултираше. Спасувачката екипа го пронајде во стабилна состојба. Немаше жртви на земја“, се додава.
Според украинските медиуми, инцидентот се случил во северозападниот регион Волин, објави Ројтерс.
Првиот авион „Мираж“ пристигна во украинската армија во февруари, откако американските борбени авиони Ф-16 почнаа да пристигнуваат од неколку земји минатата година.
Со овие авиони, западните сојузници се обидуваат да му помогнат на Киев да ја модернизира својата воздухопловна флота, која во голема мера е од советската ера.