Филипините размислуваат за купување американски хеликоптери Chinook, откако го раскинаа договорот со Русија вреден 227 милиони долари, со цел Манила да избегне санкции, изјави денеска Филипинскиот амбасадор Хозе Мануел Ромуалдез во Вашингтон.
Непосредно пред крајот на шестгодишниот мандат на поранешниот претседател Родриго Дутерте, Филипините го откажаа договорот за купување на 16 руски транспортни хеликоптери Ми-17 поради стравувања од американски санкции.
– Ова откажување на договорот беше поради војната во Украина. Поради потенцијалните санкции на Америка и Западот, очигледно е дека не е во наш интерес да продолжиме со овој договор – изјави Ромуалдез.
САД се подготвени да постигнат договор за парите што Филипините ги ставија за купување руски хеликоптери, рече Ромуалдез, додавајќи дека договорот со Вашингтон најверојатно ќе вклучува одржување, сервисирање и делови за хеликоптерите.
Филипините преговараат со Русија за враќање на авансот од 38 милиони долари за хеликоптерите, кои требаше да бидат испорачани во ноември следната година.