Министерот за здравство Венко Филипче денеска на прес конференција одговарајќи на новинарски прашања рече дека не ја исклучува можноста за задолжително вакцинирање против Ковид-19.
– Апсолутно мислам дека дополнителна мерка, во смисла на некаква форма оваа вакцина да биде задолжителна согласно искуствата и примерите од другите земји кои ќе ги даваат во периодот пред нас, не е исклучена. Додека сето тоа се осмисли, да се види и провери како овие мерки ќе имаат резултат, остануваме со овие мерки, посочи Филипче.
Сепак, додава дека сѐ уште е рано за ваква мерка кај нас. Вели дека воведување карантин во состојба кога скоро половина од населението е вакцинирано не би требало да биде опција.
– Сметам дека генерално карантинизирање, во смисла на рестрикција на движење, сега во ситуација кога имаме близу 50 проценти опфат на вакцинација, не би требало да е опција, но не знаеме што може да се случи, изјави денеска министерот за здравство Венко Филипче.
Во насока на стимулација на интересот за вакцинација за заштита од КОВИД-19 и за спречување на ширењето на пандемијата, Владата вчера донесе одлука за еднократна финансиска награда во висина од 30 денари по пациент за матичните лекари доколку достигнат и надминат опфат од 70% со вакцинација на своите пациенти од вкупниот број запишани кај нив.
Министерот вели дека важно е да вакцинацијата се зголеми преку апели и преку мерката со матичните лекари. Добро е, вели Филипче, апели да и има и од големите компании кон нивните вработени.
Никола Ивановски