Филип Петровски: „Инспирацијата за пишување не бира место и време“

Млад, енергичен и харизматичен, има 23 години, а веќе работи на својата втора книга, паралелно студираше на инструменталниот оддел при Факултетот за музичка уметност, каде свиреше на фагот. Слободоумноста ја пренесува и на хартија, а за разлика од порано, сега наместо љубовта често прави комбинација од повеќе теми.

Пред неколку месеци го промовираше своето прво дело „Светот во световите“, а веќе наскоро можеме да го очекуваме продолжението. Тоа беше причина да поразговараме со младиот уметник од Куманово.

КМ: Пред неколку месеци ја промовираше книгата „Светот во световите“. Која е тематиката на истата?

– Книгата „Светот во световите“, беше промовирана пред публиката пред нешто повеќе од 6 месеци. На промоцијата имаше голем број на љуѓе и љубители на пишаниот збор. Беа присутни и млади и стари. Беше тоа една необична вечер за промоција на книга за сите присутни рецептори на креативноста и уметноста преку драмски и музички точки.  Спој од филозофија, психологија и спиритуалност,  генерички склопено со метафорична кохезија ,    ја претставуваат тематиката на ова книга.

КМ: На какви реакции наиде по објавувањето на своето дело и како тоа влијае на еден млад автор?

– Искрено, кога ќе ми го постават ова прашање, неизмерна, а во исто време и скромна насмевка ми се оцртува.  А среќата и замислената цел се претопуваат во едно чувство.До сега,  можам да кажам дека ми се јавија голем број на читатели , кои ми рекоа дека книгата допрела длабоко во нивната внатрешност на душата.  Не би можел да го најдам правиот термин како тоа влијае на мене… зарем има нешто поубаво и појако од тоа да допреш во нечија душа и во нечие срце и да оставиш белег , белег кои ќе роди имплуси на среќа, исполнетост и позитивни емоции во човекот?

 

КМ: Според тебе, може ли да се успее во Македонија како автор?

– Мојата позитивност во карактерот што ја носам, вели: „секако дека може“.  Но мора да ја земеме во предвид и реалната слика на уметноста во Македонија , од било кој тип и да е. Се надевам дека можат авторите да успејат, и на секој им посакувам да успее, без разлика дали е писател, сликар или композитор.  Со некое чудо и неизмерна енергија,како да се претстави делото, на разни начини пред публиката, мислам дека сепак може да се успее како автор, во било која област, ако знае авторот како да допре до оној што ја сака уметноста.

КМ: Од каде црпеш инспирација за пишување?

– Инспирација за пишување не бира место и време.  Додека седам на автобуска станица и чекам, неизмерната детска радост на детото кое трчи, може да пробуди емоција во мене. И од тоа да се напише расказ за детската среќа, безгранична и слободна како птица. Секако проблемите на модерниот човек многу ме инспирираат. Секој е подлежен на стрест, страв, нервоза.  А внатре во мене има една искра, која сака секој да е среќен. Оттаму ми е инспирација да пишувам за позитивноста  и како да се отргнеме од сите модерни појави, кои води во една дегенерација на човечката среќа, моралниот интегритет и чесноста.  Сакам секој да е среќен.

КМ: Дали моментално работиш на некоја нова книга?

 Моментално сум посветен на довшрување на книга со илустрации, која ќе е со иронично – комичен – саркастично – поучен карактер, за кој верувам дека за брзо време ќе бидне промовирана пред читателите. Има јасна цел, да му разбуди насмевка на читателот а вооедно и да го збогати со многу информации. По завршувањето на ова дело, ќе се вратам на продолжението на првата книга –  Светот во световите, која воедно ќе остави простор и за трет дел од истата. Ќе ви го откријам и наслов, а тој гласи „Предавникот на ѓаволот“.

КМ: На кои теми преферираш да пишуваш, а што обожаваш да читаш?

– Во последно време, за разлика од порано кога пишував повеќето за љубовта, сега не бирам тематика.  Не се вржувам во круг на етикетирањето на стилскиот израз. Сакам  да пишувam и да играм со зборовите и мислите во секој правец на пишување. Мистерија, драма, хорор, научно фантастични раскази, кои воедно ги има во голем дел во продлжението на “Светот во Световите”.

КМ: Што освен пишувањето и музиката приватно те исполнува?

-Собирање на разни артефакти од древните цивилизации. Прошетки во природата и уживање во тишината. Патување и пикник авантури. Секако тука се и долгите разговори со пријателите и блиските љуѓе. 

КМ: Како се гледаш себе си во следните 10 години, во Македонија или странство?

– Ако не ми се исполнат очекувањата тука во Македонија во мојата професија,  секако дека се гледам себе си во странство. 

 

КМ: Кое е твоето животно мото?

Да не си вреден за животот, и да немаш што да му понудиш, не би бил повеќе, тука и сега жив, и јас и ти. Секогаш е сега, а животот сам по себе е вреден и мистично исполент со безброј убавини за живеење. Качи се на бродот наречен дух и плови по необјаснетите феномени на космосот и нема да го бараш животното мото, бидејќи животот станува мото сам по себе.