Шефот на турската дипломатија, Хакан Фидан, денес изјави дека Турција е подготвена да биде де факто гарант, доколку решението со две држави се спроведе во Палестина, додавајќи дека тоа е голема обврска, објавија турските медиуми.
Тој рече дека Турција досега била посредник во напорите за завршување на војната во Газа, промовирајќи мир преку долгорочна поддршка на палестинската борба, објави агенцијата Анадолу.
„Доколку се постигне договор прифатлив за Палестинците, ние сме подготвени да го направиме својот дел. Доколку решението со две држави, засновано на границите од 1967 година, се спроведе, Турција е подготвена да ја преземе одговорноста на де факто гарант“, истакна Фидан, додавајќи дека тоа е голема одговорност што не е подготвена да ја преземе секоја земја.
Тој додаде дека е формирана работна група за справување со оперативните прашања за време на процесот на прекин на огнот во Газа, вклучително и прашања поврзани со размена и враќање на заложниците.
Како што изјави тој, продолжуваат дискусиите за трите институционални механизми предвидени во мировниот план на американскиот претседател Доналд Трамп, имено работната група, мировниот совет и силите за стабилизација.
Сепак, нивните мандати и состав сè уште не се финализирани.
Фидан нагласи дека координацијата на турските одбранбени и разузнавачки активности ја покажува подготвеноста на Турција да преземе поголема одговорност доколку се постигне мир.