Словачка ќе губи 500 милиони евра годишно како такси за транзит на гас поради одлуката на украинскиот претседател Володимир Зеленски да ја прекине испораката на руски гас преку Украина, изјави словачкиот премиер Роберт Фицо, пренесува агенцијата Танјуг.
Во објава на Фејсбук, Фицо напиша дека неговата партија Смер-СД е подготвена да преговара со своите коалициски партнери за усвојување реципрочни мерки, вклучително и суспендирање на снабдувањето со електрична енергија за Украина, како и ограничување на поддршката за украинските граѓани во Словачка. објави агенцијата ТАСР.
„Верувам дека и коалициските партнери ја гледаат ситуацијата во врска со прекинот на транзитот на гас како исклучително сериозна и достојна за одговор од суверена Словачка. Единствената алтернатива за суверена Словачка е да продолжи со транзитот или да бара механизми за компензација за да се компензира загубата од речиси 500 милиони јавни финансии“, рече премиерот на Словачка.
Само САД имаат корист
Покрај загубата од 500 милиони евра за Словачка, Фицо пресметал дека Европската унија ќе има финансиски товар од 60 до 70 милијарди евра поради прекинот на испораката на руски гас преку Украина.
Тој рече дека земјите-членки на ЕУ ќе ја платат оваа сума во повисоки цени на гасот и електричната енергија.
„Руската Федерација нема да биде оштетена практично на кој било начин. Само Соединетите Американски Држави ќе имаат корист од одлуката на претседателот Зеленски преку зголемување на извозот на гас во Европа“, додаде Фицо.
Договорот за транзит на руски гас преку Украина истече на 31 декември.