Европскиот парламент усвои резолуција со која се повикува ЕУ да ги зајакне санкциите против руската „флота во сенка“, што ѝ овозможува на Москва да продава нафта заобиколувајќи ги меѓународните санкции од Запад, се наведува на веб-страницата на Европскиот парламент.
Членовите на Европскиот парламент забележуваат дека Русија користи стари танкери, често без осигурување и со непознати сопственици, за извоз на сурова нафта и нафтени деривати во странство, што ја загрозува животната средина, особено поради можните излевања на нафта.
Во резолуцијата усвоена денеска, Европскиот парламент повикува на насочена акција против овие бродови во следните пакети санкции на ЕУ, вклучувајќи ги сите поединечни бродови, како и нивните сопственици, оператори, менаџери, сметки, банки и осигурителни компании.
Членовите на Европскиот парламент бараат да се зајакне надзорот на руските бродови со помош на дронови и сателити, како и да се организираат насочени инспекции на море.
Парламентот, исто така, ги повикува земјите од ЕУ да ги идентификуваат пристаништата кои можат да ги обработуваат санкционираните бродови што носат нафта или течен природен гас и да го запленат нивниот товар без надомест.
Покрај тоа, резолуцијата ги повикува земјите од Г7 да ја зајакнат контролата над плафонот на руската цена на нафтата и да се борат против „дупките“ што Русија ги користи за препакување и продажба на нафта по пазарни цени.
Европратениците ја нагласуваат важноста од прекин на увозот на руски фосилни горива, особено ЛНГ, и ја повикуваат ЕУ да ја преиспита својата соработка со земјите кои и помагаат на Русија да ги заобиколи санкциите.