Франција ќе забрани пристап до социјалните медиуми за деца под 15 години и ќе ги заостри прописите за продажба на огнено оружје на малолетници, изјави претседателот Емануел Макрон.
„Мораме да ги забраниме социјалните мрежи за деца под 15 години. Ни давам неколку месеци да ја натераме Европа да реагира. Во спротивно, ќе почнеме да го правиме тоа во Франција. Едвај чекаме“, изјави претседателот за телевизијата Франс 2, во врска со случајот кога тинејџер избоде до смрт вработен во училиште.
Макрон, исто така, вети подобро да ја регулира продажбата на оружје со сечило, вклучително и преку интернет.
„Ќе ги заостриме правилата. Ова значи дека ќе воведеме обемни финансиски санкции и забрани. Повеќе нема да можеме да го продаваме ова оружје. Петнаесетгодишен тинејџер повеќе нема да може да купи нож преку интернет“, рече Макрон.
Премиерот Франсоа Баиро изјави на социјалните медиуми дека опасноста од ладното оружје е голема и вети дека „ќе ја направи оваа широко распространета неволја јавен непријател“.
Во април, поранешниот француски премиер Габриел Атал предложи забрана за пристап до социјалните медиуми за деца под 15 години и ограничување на пристапот за постари тинејџери во текот на ноќните часови, како дел од „радикалните мерки“ за борба против зависноста од интернет.
Вчера, 15-годишен ученик избоде повеќе пати 31-годишен училишен асистент и рани полицаец во средно училиште во Ножен, во североисточна Франција, северно од бургундскиот град Дижон. Жената почина од повредите.
Инцидентот се случил за време на проверката на содржината на торбата во училиштето.
Напаѓачот бил ученички претставник во програмата против малтретирање на училиштето, а оваа година бил накратко суспендиран поради нарушување на наставата.