Талим, првиот тајфун што ја погоди Кина оваа година, стигна до провинцијата Гуангдонг во понеделникот доцна навечер, брзо ослабувајќи во тропска бура, пренесува Ројтерс.
Брзината на ветерот се спушти до максимални 90 км/ч, соопшти кинеската метеоролошка служба.
Се очекува бурата дополнително да ослабне и да исчезне додека се движи кон северозапад од земјата и кон северен Виетнам денеска, се вели во соопштението.
Во Гуангдонг, откако Талим ослабе, пожарникарите спасија патници заробени во возилата од соборени гранки од дрвја и ги исчистија дрвјата од блокираните патишта, објавија кинеските државни медиуми.
Речиси 230.000 луѓе во Гуангдонг беа евакуирани во понеделникот пред да го погоди невремето, објави државната новинска агенција Ксинхуа.
Локалните власти во Гуангдонг, исто така, наредија затворање на 68 крајбрежни туристички дестинации и наредија 2.702 рибарски бродови и 8.262 работници од рибарската индустрија да се евакуираат на брегот, соопшти Ксинхуа.
Во градот Гуангкси, Нанинг, државните медиуми објавија дека од понеделникот биле суспендирани 35 патнички возови, а откажани 26 летови.
Во Хаинан, островска провинција јужно од Гуангдонг, железничкиот сообраќај постепено се нормализираше од утрово, откако беше во прекин од понеделникот поради невремето.
Ефектите од тајфунот се почувствувани и на 1.000 километри североисточно, во градот Фужоу, во провинцијата Фуџијан, каде поплавите однесоа мебел и апарати за домаќинство, според снимките објавени на социјалните мрежи.